Architectura sacrala
Baselgia Parochiala s. Martin
La baselgia parochiala da Trun ei vegnida inaugurada igl onn 1662 e dedicada a s. Martin. Igl altar principal datescha da duas epocas, numnadamein dil baroc tumpriv e dil rococo. La baselgia ei bein decorada cun picturas, statuas e reliquias. La part sut dil clutger en stil roman s’udeva oriundamein tier ina baselgia pli veglia, ch’era drizzada encunter ost.
Access
| Stad | mintga gi allas 7:30-19:30 |
| Unviern | mintga gi allas 8:00-18:00 |
Accessibel cun sutga da rodas
Baselgia s. Gieri
La baselgia da Schlans ha fatg atras ina vera odissea da construcziun. La baselgia sco ella sepresenta oz datescha digl onn 1671. Igl onn 1904, cura ch’ins ha cementau ils plan tschius, han ins anflau duas fossas da spirituals, ina tiarza vegn supponida el pierti. Remarcabla ei la pictura vid la preit sid dil clutger. Quei fresco representa las lavurs scumandadas ils firaus.
Access
| Stad | mintga gi allas 7:30-19:30 |
| Unviern | mintga gi allas 8:00-18:00 |
Buca accessibel cun sutga da rodas
Baselgia s. Giachen
La baselgia a Zignau ei vegnida baghegiada ils onns 1929–1931 suenter che l’anteriura era vegnida disfatga d’ina bova giu dalla val Zavragia igl onn 1927. Ils treis altars ein vegni salvai ed integrai ella baselgia nova. Era en questa baselgia anflein nus il baroc ed il rococo. La nova baselgia ei vegnida erigida ordeifer la zona da prighel. In sontget regorda al liug dalla baselgia destruida.
Access
| Stad | mintga gi allas 7:30-19:30 |
| Unviern | mintga gi allas 8:00-18:00 |
Accessibel cun sutga da rodas
Baselgia Nossadunna dalla Glisch
La baselgia barocca ei renomada sco liug da pelegrinadi. Ins anfla pliras tablas votivas, denter auter era ina che Alois Carigiet veva malegiau 1941 cul fervent giavisch d’anflar ina dunna. Entrond en baselgia dat igl altar grond cun Nossadunna en egl. Remarcabla ei denton surtut la gronda pictura murala cun la processiun triumfala da Maria malegiada davon sin igl artg dil chor.
Access
| Stad | mintga gi allas 7:30-19:30 |
| Unviern | mintga gi allas 8:00-18:00 |
Accessibel cun sutga da rodas
Capluttas
Sil territori dalla vischnaunca da Trun dat ei otg capluttas, numnadamein quellas da s. Onna a Trun, s. Giusep a Darvella, s. Catrina a Campliun, s. Valentin a Cartatscha, s. Brida sin l’Alp Nadels, Nossadunna dalla neiv a Schlans e duas ch’ein integradas en edifecis publics, numnadamein s. Balugna en la Cuort Ligia Grischa (la caplutta privata digl avat da Mustér) e la caplutta en la Casa sogn Martin.
Uras d’avertura
Sin damonda
Excepziuns
Aviartas duront il temps da stad:
Caplutta s. Balugna, Cuort Ligia Grischa; Caplutta s. Giusep, Darvella; Caplutta Nossadunna dalla Neiv, Schlans; Caplutta s. Brida, Nadels
Informaziuns
Pleiv catolica romana Trun
