Rapport dil cussegl da vischnaunca dils 09-11-2026
Rapport dalla sessiun dil cussegl da vischnaunca dils 09-11-2026
Tractanda 1 Approbaziun dil protocol dalla sessiun dils 24-08-2026
Il protocol dalla sessiun dils 24 d’uost 2026 vegn approbaus cun engraziament.
Tractanda 2 Presentaziun dil quen 2025 dalla Campadi Trun SA
Il president dalla Campadi Trun SA, Marcus Hasler, presenta il quen 2025 ed informescha il cussegl da vischnaunca davart la situaziun finanziala dil campadi suenter che la vischnaunca ha surpriu las immobilias igl 1. da december 2024.
Tractanda 3 Revisiun parziala dalla lescha da polizia
La lescha da polizia dalla vischnaunca da Trun ei vegnida approbada dil pievel il settember 2022. En ina pintga revisiun dalla lescha duei vegnir aschuntau dus artechels per saver punir surpassaments entras multas disciplinaras. Questa stad ei semussau ch’ei vegn adina dapli campaders selvadis en nossa vischnaunca. Tenor artechel 12 dalla lescha da polizia ei campar lubiu mo sin plazzas designadas. Cunquei ch’ei setracta savens da glieud digl exteriur eis ei necessari da saver castigiar quels directamein el liug cun ina multa disciplinara. Vinavon eis ei era d’avantatg da saver castigiar auters surpassaments sco per exempel il scamond da fiugs artificials ni disturbis dil ruaus da notg cun multas disciplinaras. La suprastonza communala vegn autorisada da luvrar ora in catalog da multas per surpassaments dalla lescha da polizia.
Il cussegl da vischnaunca approbescha cun 11 : 0 vuschs la revisiun parziala dalla lescha da polizia e decida da suttametter la fatschenta alla radunonza communala tenor art. 33 al. b dalla constituziun communala.
Tractanda 4 Fixaziun dil pei da taglia per igl onn 2027
La suprastonza communala e la cumissiun da gestiun han examinau ils fatgs ed ein digl avis da restar per igl onn 2027 sin in pei da taglia da 95%.
Il cussegl propona cun 11 : 0 vuschs per mauns dalla radunonza da vischnaunca da fixar il pei da taglia communala per igl onn 2027 sin 95% dalla taglia cantunala sempla.
Tractanda 5 Preventiv 2027
President communal Dumeni Tomaschett informescha ch’il preventiv dil quen da gudogn e sperdita 2027 siara cun in surpli d’expensas da frs. 559’275.-. Il gudogn avon amortisaziuns munta à frs. 24’550.-. Il quen d’investiziuns preveda investiziuns nettas da frs. 970’000.-. Aschia seresulta in deficit da finanziaziun da frs. 945’450.-.
La canzlista communala presenta il preventiv dil quen da gudogn e sperdita en detagl.
Las impurtontas posiziuns el preventiv d’investiziuns secumponan ord:
| 3290.5660.02 | Contribuziun museum Cuort Ligia Grischa | Frs. 80’000.- |
| 6150.5010.08 | Via Resgias sut | Frs. 75’000.- |
| 6150.5010.09 | Via d’Industria ost | Frs. 300’000.- |
| 6150.5010.11 | Via Sontga Catrina | Frs. 250’000.- |
| 7101.5031.01 | Sanaziun aquaduct Schlans | Frs. 225’000.- |
| 7410.5030.03 | LV Cavistrai | Frs. 350’000.- |
| 8110.5660.00 | Contribuziun Alp Nadels vid sanaziun dalla via | Frs. 100’000.- |
Il cussegl decida cun 11 : 0 vuschs da proponer per mauns dalla radunonza da vischnaunca d’approbar:
- il preventiv dil quen da gudogn e sperdita che siara cun expensas da frs. 10’024’525.- ed entradas da frs. 9’465’250.-, pia cun in surpli d’expensas da frs. 559’275.-
- il preventiv dil quen d’investiziuns che siara tier expensas da frs. 1’380’000.- ed entradas da frs. 410’000.- cun in surpli d’expensas da frs. 970’000.-
Tractanda 6 Presentaziun dalla planisaziun da finanzas 2027 – 2031
Il plan da finanzas vegn duvraus per planisar e per direger a media vesta las prestaziuns e las finanzas. La lescha da finanzas dil cantuna Grischun preveda che quel vegn repassaus annualmein el senn d’ina planisaziun successiva. La stad 2026 ha la canzlista elaborau ensemen cun la suprastonza communala il plan da finanzas 2027 – 2031. Oravontut ils pli bass recavs ord la vendita d’energia, ils pli bass tscheins d’aua pervia dallas cundiziuns meterologicas e differentas malsegirtads en connex cun midadas tier las taglias (p.ex. aboliziun dalla taglia sin l’atgna locaziun) sforzan las instanzas politicas da spargnar e planisar las investiziuns per ils proxims onns a moda fetg precauta.
Il cussegl da vischnaunca pren enconuschientscha dalla planisaziun da finanzas e fa diever dalla pusseivladad da tschentar damondas.
Tractanda 7 Verificaziun dil resultat dallas elecziuns communalas dils 27-09-2026
Cusseglier Claudio Thalmann declara che la cumissiun per verificaziun da votaziuns hagi controllau ils resultats dallas elecziuns communalas dils 27 da settember 2026 ed anflau tut en uorden. En num dalla cumissiun propona Claudio Thalmann da verificar ils resultats publicai.
En votaziun unanima verifichescha il cussegl ils resultats publicai dallas elecziuns communalas dils 27-09-2026.
Tractanda 8 Pusseivladad da tschentar damondas
Dalla pusseivladad da tschentar damondas vegn fatg diever.
Per il cussegl da vischnaunca
Il president
Wendelin Decurtins
Per la suprastonza communala
Il president
Dumeni Tomaschett
