Sut igl Ischi 2024: Détgas e Fatg(a)s d’ina perdetga metta
«Detgas e fatg(a)s d’ina perdetga metta» ei in’ovra multimediala cun cant, musica e films. Il fil tgietschen da quella ei la historia digl ischi da Trun. D’ina vart vegn raquintau ord la historia dalla plonta sco tala naven da sia entschatta tochen oz a maun da fatgs historics. Da l’autra vart la historia co igl ischi da Trun ei daventaus quella perdetga mitica dalla Ligia Grischa onns alla liunga venerada sc’ina reliquia. Quella sebasa plitost sin detgas, poesias e canzuns ed entscheiva – per propi – cun l’emprema fiasta centenara dalla ligia che pader Placi a Spescha ha organisau 1824 e culminescha cun la gronda fiasta centenara da 1924.
Affons, chors, solistas, solists ed orchester contan e sunan la musica accumpignada da maletgs, films cuorts e fatgs historics. Ei vegn sunau ovras musicalas ch’ein resultadas en occasiun dallas differentas manifestaziuns sut igl ischi. Per exempel dil giug festiv «Trunser Festspiel» da Duri Sialm, sco era ovras contemporanas dils interprets Alexi e Marcus, Pascal Gamboni ni Corin Curschellas. Il cumponist da film Lorenz Dangel da Berlin scriva plinavon nova musica che cumbinescha ils differents stils musicals.
Enten raquintar l’historia digl ischi da Trun vegn era raquintada la historia dil cant romontsch. Quel ha giugau ina rolla impurtonta pils Grischuns e – surtut – pils Sursilvans sin lur via en Svizra. L’occurrenza sedrezza ad in public interessaus vid la historia, mo era als amaturs da cant, musica e film.
Responsabel: Clau Scherrer
