Historia e cultura
Museum Sursilvan Cuort Ligia Grischa Grep ault
Curtin d’honurCasti da FarbertgCasti da RinggenbergCasti da CartatschaTuor da SaisCasti da Salons
Museum Sursilvan Cuort Ligia Grischa
La Cuort claustrala ei vegnida erigida ils onns 1674–1679 digl avat dalla claustra da Mustér ed ei stada onns ora la sedia dalla Ligia Grischa. Il baghetg da 4 alzadas cun sias stanzas historicas, sco la stiva digl avat e la sala dils causligia, dat dapi 1934 suttetg al Museum Sursilvan.
Uras d‘avertura
Miez avrel – la fin d’october:
gliendisdis, mesjamna, sonda e la 2. e 4. dumengia dil meins mintgamai allas 14:00–17:00.
Visetas da gruppas e sentupadas privatas ein era pusseivlas ordeifer quei urari.
Informaziuns
Tel. 081 943 25 83 | Homepage Museum
Grep Ault
Culegna cun fastitgs dil temps da bronz tumpriv (2000–1600 a. C.) entochen il temps tumpriv medieval (400–700 s. C.) cun restonzas da mirs, crappa e plattas tschentadas, fueinas e furnaschas, ruosnas da posts, scalgias da cheramica ed objects da fier e bronz. Egl ost dil plateau catt’ins aunc oz fundaments d’in sanctuari cristian dil 6avel ni 7avel tschentaner.
Access
Mintga di access liber (buca accessibel cun sutga da rodas)
Via agricola – scamond da carrar
Curtin d’honur
Il curtin digl ischi ei daventaus pér suenter la renovaziun dalla caplutta da s. Onna ed il centenari da 500 onns Ligia Grischa 1924 in liug da commemoraziun per persunalitads meriteivlas per lungatg e litteratura romontscha, per cant e musica e las scienzias. Igl ischi ch’ei uss el curtin ei tratgs ord ina fadetgna digl ischi oriund ch’ei daventaus l’unfrenda d’in stemprau il 1870.
Access
Mintga di access liber (buca accessibel cun sutga da rodas)
Casti da Farbertg
Dataus entuorn 1200 po il casti ver in con-nex cun ils nobels da Friberg da Siat, quei ch’ei denton buca cumprovau. Sigl ault dalla morena san ins aunc fastisar zatgei reston-zas da mirs. Oz ei denton mo pli la cistiarna bein veseivla dalla via giu da Schlans.
Il davos rest d’in mir ell’altezia da 4 ni 5 alzadas ei curdaus en consequenza d’in tiaratriembel 1911.
Access
Mintga di access liber (buca accessibel cun sutga da rodas)
Casti da Ringgenberg
Il casti sa vegnir dataus amiez ni ella secunda mesadad dil 13avel tschentaner. La tuor da 4 alzadas fuorma il center dils stabiliments dil casti, ils quals san buca vegnir defini claramein. Special vid la tuor ei ch’ils mirs vegnan dad alzada tier alzada pli graschels aschia ch’il spazi interiur ei sisum pli gronds che giudem. La tuor ei oz en possess privat.
Mintga di access liber (buca accessibel cun sutga da rodas)
Via agricola – scamond da carrar
Casti da Cartatscha
Il casti formava probabel la sedia d’in minis-terial ni castellan dalla claustra da Mustér. Muort l’architectura suppon’ins ch’el seigi vegnius erigius all’entschatta dil 13avel tschentaner e possedevi silmeins 3 alzadas. En egl dattan ils mirs solids surtut cun lur blocs quasi rectangulars da tochen 2.7 m lunghezia che dattan fuorma e sustegn als cantuns dil baghetg. Oz en possess privat.
Access
Mintga di access liber (buca accessibel cun sutga da rodas)
Carrar mo cun lubientscha
Tuor da Sais
Il baghetg da treis alzadas possedeva probabel in’ulteriura construcziun da lenn sco spazi da habitar. Quella tuor massiva, quasi qua-drata cun mirs da biebein 2 m grossezia ei vegnida erigida entuorn 1200. La tuor da Sais en vischinonza da Schlans fa plitost ina pareta mudesta e surveva probabel sco sedia d’in ministerial dils Signurs da Salons.
Access
Mintga di access liber (buca accessibel cun sutga da rodas)
Casti da Salons
Erigius probabel el 13avel tschentaner, surveva il casti tgunsch sco bein propri als Signurs da Schlans ed ei ius, suenter che quella famiglia era morta ora, als de Montalt. Il casti consisteva probabel ord in mir da protecziun, in circumdont ed in da sustegn, ina tuor, in baghetg quadratic ed in portal. Mo pli restonzas da mirs dattan aunc per-detga da quels impurtonts stabiliments.
Access
Mintga di access liber (buca accessibel cun sutga da rodas)
