Rapport dalla sessiun dil cussegl da vischnaunca dils 24-08-2026
Tractanda 1 Approbaziun dil protocol dalla sessiun dils 04-05-2026
Il protocol dalla sessiun dils 4 da matg 2026 vegn approbaus cun engraziament.
Tractanda 2 Revisiun parziala dil reglament per far diever dallas vias d’uaul cun vehichels a motor
Naven dalla proxima primavera vul la suprastonza communala possibilitar da pagar digitalmein lubientschas dil di per carrar sin vias d’uaul. Per saver porscher da retrer las cartas a moda digitala vegn proponiu en questa revisiun parziala dil regulativ d’alzar il prezi per la carta dil di naven da frs. 7.- sin frs. 10.-.
Ulteriuramein duei la via Alp da Schlans vegnir aschuntada en artechel 2 excepziuns dil scamond da carrar.
Cun 13 : 0 vuschs approbescha il cussegl da vischnaunca la revisiun parziala dil reglament per far diever dallas vias d’uaul cun vehichels a motor.
Tractanda 3 Revisiun parziala dil reglament da schulda e castitgs dil corp da pumpiers Sumvitg-Trun
67 persunas prestan actualmein survetsch activ el corp da pumpiers Sumvitg-Trun. Il corp da pumpiers ha miserias da recrutar avunda persunal, oravontut maunca persunal da cader (officiers e meinagruppas). La cumissiun da fiug e la suprastonza communala proponan en quella revisiun dil reglament divers alzaments dallas indemnisaziuns dils pumpiers.
Il cussegl da vischnaunca approbescha cun 13 : 0 vuschs la revisiun parziala dil reglament da schulda e castitgs dil corp da pumpiers Sumvitg-Trun.
Tractanda 4 Damonda da credit per sustegn d’abonnaments da sport
La suprastonza communala vul promover la sanadad d’affons e giuvenils cun sustegn finanzial per far sport. En fuorma d’in project da pilot duei vegnir introduciu in sistem da bons.
Actualmein ein 161 affons da nossa vischnaunca en la vegliadetgna denter 0 e 18 onns. Ils cuosts annuals per la vischnaunca vegnan schazegiai sin frs. 30’000.-.
Il cussegl da vischnaunca conceda cun 13 : 0 vuschs il credit da frs. 30’000.- ad onn per sustegn d’abonnaments da sport per affons e giuvenils.
Tractanda 5 Pusseivladad da tschentar damondas
Dalla pusseivladad da tschentar damondas vegn fatg diever.
Per il cussegl da vischnaunca
Il president
Wendelin Decurtins
Per la suprastonza communala
Il president
Dumeni Tomaschett
