Iniziativa per in plaz da pausa adattau als basegns dils affons da scola
Preziadas convischinas e preziai convischins
Il davos da mars 2023 ha la suprastonza communala retschiert ina iniziativa dil pievel per in plaz da pausa adattau als basegns dils affons da scola. Suandontamein il text dall’iniziativa (citat):
“Moviment promova en general la habilitad da tschaffar si ed emprender. Nies plaz da scola ed ils urdeins disponibels ni intimeschan ni promovan talas activitads tier e denter ils affons. Perquei pretendan ils sutsignai iniziants ch’ils gremis communals responsabels elaboreschien entochen ils 30 da settember 2023 in project per midar il “plaz da parcar” existent en in spazi che porscha als affons duront pausa, sco era avon e suenter l’instrucziun adattadas pusseivladads da semover e termagliar. Ils differents urdeins ed il material disponipel dueien risguardar las differentas vegliadetgnas ed ils differents basegns dils affons. Il project ei da vegnir realisaus entochen l’entschatta digl onn da scola 2024/2025. Entras possibilitar il giugar e termagliar ensemen, sco era il saver rimnar ensemen novas experientschas, duei il spazi disponibel perquei principalmein puspei survir ad ils affons sco “plaz scola” resp. “plaz da pausa” enstagl da plaz da parcar.”
102 persunas cun dretg da votar en nossa vischnaunca han susteniu l’iniziativa cun sia suttascripziun. L’iniziativa ei valeivla. En ina emprema sesida il matg 2023 han il president communal ed il gerau responsabel ensemen cun las tschun empremas iniziantas priu investa digl areal da scola che cumpeglia il plaz catramau ed il plaz da sulada gest avon la scola, il plaz verd sura e da maun ost dalla scola e la plazza da sport sur il center communal. Igl ei vegniu fixau che las iniziantas inoltreschien propostas concretas per mesiras sil plaz da scola. El decuors dil november ha giu liug ina ulteriura sesida. Sin giavisch dallas empremas tschun iniziantas ha la suprastonza communala decidiu d’elaborar in project ensemen cul post specialisau per la promoziun da sanadad dil cantun Grischun. Aschiprest ch’il project ei avon maun vegn quel publicaus.
Suprastonza communala Trun
