Malauras dils 26-08-2023 (Situaziun 02-09-23)
6. Informaziun 02-09-2023
La gievgia encunter sera eis ei reussiu da far liber l’emprema finiastra dil rempar. L’aua sa cuorer giu. Duront las proximas jamnas sa il material necessari vegnir rumius, aschia ch’il rempar sa ademplir duront il proxim unviern sia funcziun da protecziun encunter lavinas.
5. Informaziun 28-08-2023 / 16.00 uras
Il stab directiv ei lundervi da procurar per las maschinas per ch’il rempar dalla Zinzera sappi vegnir rumius ton sco pusseivel sigl unviern.
Nus lein prender la caschun per far attents che neginas casadas sesanflan en zona da prighel 1 (tschietschen) ni en zona da prighel 2 (blau). Il rempar ademplescha sia funcziun ed ei exista negin prighel pils habitonts dil quartier Zinzera e Darvella.
4. Informaziun 27-08-2023 / 18.30 uras
Il stab directiv ha observau intensivamein la situaziun. Cunquei ch’ei ha dau entginas pausas dalla plievgia e cunquei ch’ei neiva els aults vegn buca quintau cun ulteriuras bovas grondas en la val Zinzera. Il stab directiv ei dil meini che tut las casadas ein vinavon segiras e decida actualmein neginas ulteriuras mesiras. Ils commembers dil stab vegnan a tener en egl la situaziun, e quei era duront la notg.
3. Informaziun 27-08-2023 / 12.00 uras
Mesiras actualas:
- La via enviers Nadels ei serrada
- La via da velos Rensch ei serrada
- La senda Sursilvana denter Cartatscha e Schlans ei serrada
2. Informaziun 27-08-2023 / 08.30 uras
Rempar Zinzera: L’aua flessegia sur il rempar ora e va en il canal dalla Zinzera. Suenter ver priu investa cun persunas dil fatg ei semussau ch’igl ei el mument buca pusseivel da far liber las ruosnas dil rempar e da disviar l’aua sestupada.
Il stab directiv observescha vinavon la situaziun. Actualmein vegn priu neginas novas mesiras. Ei exista vinavon negin prighel per la populaziun.
Contact:
079 682 25 52 (president communal)
079 417 49 57 (selvicultur e cussegliader local da prighels)
081 920 20 40 (canzlista)
1. Informaziun 26-08-2023 / 15.00 uras
La ferma plievgia dalla notg vargada ha effectuau plirs donns sin territori da vischnaunca.
Ina bova ha empleniu il rempar dalla Zinzera. Il stab directiv ei en funcziun ed observescha in cuntin la situaziun. Actualmein exista negin prighel per la populaziun.
Il stab directiv informescha sin questa pagina davart la situaziun ed eventualas mesiras.
Mesiras actualas:
La senda Sursilvana denter Cartatscha e Schlans ha stuiu vegnir serrada muort bovas.
Contact:
079 682 25 52 (president communal)
079 417 49 57 (selvicultur e cussegliader local da prighels)
081 920 20 40 (canzlista)
Stab directiv communal
