Nova organisaziun dalla rimnada da rumians
Preziadas convischinas, preziai convischins
Cun la finamira da saver sligiar si la rimnada da rumians a Caltgeras ha la suprastonza communala decidiu da tschentar molocs per rumien da casa sil territori da vischnaunca.
Gia vegni tschentai ein ils molocs a Gravas sut, Trun vitg (via Resgias), quartier Dulezi e Via Darvella.
Il moloc a Pustget vegn tschentaus el rom dalla sanaziun dalla via che ha liug naven da miez uost 2023. Il moloc a Campliun vegn tschentaus igl onn 2024 cu la via Carmanera vegn sanada. A Zignau vegn la casa da rumien existenta remplazzada entras in moloc duront il proxim temps. Sil parcadi visavi la Cuort Ligia Grischa vegn il moloc da veider remplazzaus entras in secund moloc per rumien da casa.
Leu nua ch’ils molocs ein gia tschentai (Trun vitg) supplichein nus da buca pli deponer la mesjamna sacs sper via.
La casa da rumien ed ils differents containers a Caltgeras vegnan allontanai duront ils proxims dis. La nova rimnada da rumien dalla vischnaunca da Trun sesanfla ad interim tier las baraccas dil militar «MSA» davos il plaz da ballapei. Leu ei pusseivel da deponer suandont: Veider, cuppas, pet, plastic (en sacs blaus dalla Regiun Surselva), ieli vegl e vestgadira. La rimnada da rumians «MSA» ei el mument accessibla duront igl entir di. Per evitar uras d’avertura restrenschidas e cuosts da persunal vegnin nus a survigilar il liug cun video. Nus supplichein da dismetter sulettamein rumians ch’ein descrets sils containers.
Per damondas stat l’administraziun communala bugen a disposiziun (081 920 20 40 ni canzlia@trun.ch).
Suprastonza communala Trun
