Rapport dil cussegl da vischnaunca
Rapport dalla sessiun dil cussegl da vischnaunca dils 14-11-2022
Tractanda 1 Approbaziun dil protocol dalla sessiun dils 17-10-2022
Il protocol dalla sessiun dils 17-10-2022 vegn approbaus cun engraziament.
Tractanda 2 Elecziuns dil biro dil cussegl
Per igl onn d’uffeci 2023 vegnan las suandontas persunas elegidas:
| a) | Presidenta dil cussegl: |
| Flurina Bundi | |
| b) | Vicepresident dil cussegl: |
| Bruno Pfister | |
| c) | 2 dumbravuschs |
| Clemens Bundi
Wendelin Decurtins |
|
| d) | 2 suppleants da dumbravuschs: |
| Baseli Tomaschett
Flavio Tuor |
|
| e) | Actuara: |
| Rita Wolf |
Tractanda 3 Damonda dalla fundaziun Cuort Ligia Grischa per ina contribuziun da frs. 120’000.- vid la restauraziun dalla fatschada dil museum Cuort Ligia Grischa
La fatschada dalla Cuort Ligia Grischa basegna ina restauraziun. La davosa restauraziun ei gia passa trenta onns anavos e specialmein ils barcuns da lenn ch’eran buca vegni sanai da quei temps ein en in schliet stadi. La substanza architectonica preziusa che stat sut protecziun da monuments duei vegnir mantenida ed igl edifeci duei splendurar igl onn da giubileum 2024 «600 onns Ligia Grischa» en nova tarlischur.
Ils cuosts totals per la restauraziun muntan a frs. 390’000.-. Il baghetg Cuort Ligia Grischa ei integraus egl Inventari federal svizzer dils maletgs dil vitg ch’ein digns da vegnir protegi (ISOS), aschia che la tgira da monuments dil Grischun sco eventualmein era la Confederaziun separticipeschan cun subvenziuns. La fundaziun communizeivla Cuort Ligia Grischa po ord atgna forza denton buca finanziar cumpleinamain il grond ed impurtont project ed ei dependenta d’ulteriuras contribuziuns dil maun public, da prestaziuns da tiarzas persunas e da donaziuns. Ella damonda la vischnaunca per ina contribuziun da frs. 120’000.-.
Cun 12 : 0 vuschs conceda il cussegl da vischnaunca il credit da frs. 120’000.- per la sanaziun dalla fatschada dalla Cuort Ligia Grischa, cun resalva dil referendum facultativ (art. 19 alinea b constituziun communala).
Tractanda 4 Fixaziun dil pei da taglia per igl onn 2023
Dapi igl onn 2012 ha la vischnaunca da Trun in pei da taglia da 105 pertschien.
La fiera d’energia ei actualmein fetg favoreivla per la vischnaunca da Trun che posseda 2.625 pertschien dallas aczias dallas ovras electricas Reinanteriur (ORA). Ferton che la vischnaunca profitescha da varga 3 milliuns dapli entradas, pagan ils privats entuorn 30% dapli per l’energia. La suprastonza communala vul dar anavos zatgei al pievel ed ei dil meini ch’in sbassament dil pei da taglia per 10% seigi indicaus. La cumissiun da gestiun sustegn quei sbassament.
Il cussegl propona cun 12 : 0 vuschs per mauns dalla radunonza da vischnaunca da fixar la taglia communala per igl onn 2023 sin 95% dalla taglia cantunala sempla.
Tractanda 5 Preventiv 2023
President communal Dumeni Tomaschett informescha ch’il preventiv dil quen da gudogn e sperdita 2023 siara cun in surpli d’entradas da frs. 2’749’000.-. Il gudogn avon amortisaziuns munta à frs. 3’225’800.-. Il quen d’investiziuns preveda investiziuns nettas da frs. 2’929’000.-. Aschia seresulta in surpli da finanziaziun da frs. 296’800.-.
La canzlista communala presenta il preventiv dil quen da gudogn e sperdita en detagl.
Las impurtontas posiziuns el preventiv d’investiziuns secumponan ord:
| 3290.5290.00 | Fiasta 600 onns Ligia Grischa | frs. | 150‘000.00 |
| 3290.5660.00 | Contribuziun restauraziun fatschada Cuort Ligia Grischa | frs. | 120‘000.00 |
| 6150.5010.05 | Via Campliun – Caltgadira | frs. | 1‘270‘000.00 |
| 6150.5010.06 | Via Pustget | frs. | 415‘000.00 |
| 6150.5010.90 | Sanaziun illuminaziun publica (project viafier) | frs. | 150‘000.00 |
| 6190.5060.00 | Maschina communala | frs. | 240’000.00 |
| 7301.5030.00 | Sanaziun deponias da rumians | frs. | 100’000.00 |
| 8205.5010.04 | Via Nadels – Rost | frs. | 1’000’000.00 |
Il cussegl decida cun 12 : 0 vuschs da proponer per mauns dalla radunonza da vischnaunca d’approbar:
- il preventiv dil quen da gudogn e sperdita che siara cun entradas da frs. 10’863’400.- ed expensas da frs. 8’114’400.-, pia cun in surpli d’entradas da frs. 2’749’000.-
- il preventiv dil quen d’investiziuns che siara tier expensas da frs. 3’720’000.- ed entradas da frs. 791’000.- cun in surpli d’expensas da frs. 2’929’000.-.
Tractanda 6 Pusseivladad da tschentar damondas
Dalla pusseivladad da tschentar damondas vegn fatg diever.
Per il cussegl da vischnaunca
Il president La actuara
Mario Lechmann Sandra Gautschi
