Decisiun da rumper giu il project da fusiun
Suenter l’analisa dils resultats dalla retscherca tier las votantas e dils votants, han las suprastonzas communalas da Sumvitg e Trun decidiu, da rumper giu il project da fusiun. Ord la retscherca ei resultau, ch’ei fuss stau pusseivel da secunvegnir en differents puncts dispiteivels. Denton ei era resultau ord la damonda, tgei tenuta che la populaziun ha da principi enviers ina fusiun sco era dils commentaris, ch’ina fusiun vegness actualmein buca sustenida en ina votaziun dal pievel.
Las vischnauncas Sumvitg e Trun tgiran gia dapi biars onns ina stretga collaboraziun. Aschia meinan las duas vischnauncas dapi igl onn da scola 2013/2014 l’entira scola populara ensemen el Consorzi da scola Sumvitg-Trun. Medemamein ein ils pumpiers vegni mess en in corp communabel. Per garantir il provediment d’aua ei vegniu engaschau ensemen in caufontauna. Era la purificaziun dallas auas tschuffas succeda en ina serenera communabla. E danovamein meinan Sumvitg e Trun in’allianza da taglia.
Las suprastonzas communalas da Sumvitg e Trun han lantschau il schaner 2019 in project communabel per sclarir co ina fusiun dallas duas vischnauncas savess veser ora. Il plan era oriundamein da schar luvrar ora la gruppa da project propostas e da discussiunar e sviluppar vinavon quellas cun la populaziun a caschun da radunonzas d’ informaziun. Sco tier bia auter, ha la pandemia da COVID-19 era fatg cheu in streh atras il quen. La gruppa da project ha perquei decidiu in auter proceder. Cun in messadi d’informaziun ein las votantas ed ils votants vegni informai sur la situaziun da partenza dallas duas vischnauncas. Medemamein ei vegniu fatg ina proposta alla populaziun, co ina vischnaunca fusiunada savess veser ora.
Ensemen cun il messadi d’informaziun han las votantas e dils votants retschiert in catalog da damondas. Il questinuari ha cumpigliau 12 damondas, las qualas han curclau denter auter las spartas num da vischnaunca, uoppen, loghens da sentupada, organisaziun politica, dretg da representar paritetic, liug dall’administraziun communala, scola, uffeci forestal, menaschi technic, agricultura sco era tegias d’alp e da catscha. Ultra da quei han ils participonts giu la caschun da communicar damondas aviarta, remarcas ed indicaziuns. Sco damonda surordinada ein las votantas ed ils votants vegni supplichai dad indicar, tgei ch’ei da principi lur meini tier ina fusiun dallas vischnauncas da Sumvitg e Trun.
En tut ein 679 persunas separticipadas alla consultaziun. A Sumvitg ha la participaziun muntau a 39.5%, a Trun 33.6%. Ord l’evaluaziun ei resultau, ch’ei fuss eventualmein pusseivel d’anflar in cumpromiss en las damondas dil uoppen, il num sco era dall’organisaziun politica tier ulteriuras contractivas. La damonda tier il meini general tier ina fusiun da vischnaunca han las votantas ed ils votants da Trun rispundiu cun 56% positiv (rispostas «plitost positiv» e «fetg positiv»). A Sumvitg han las votantas e dils votants rispundiu la damonda da fusiun cun 56% negativ (risposta «plitost negativ» e «fetg negativ»). Sin fundament d’ina analisa pli profunda dils resultats e dils commentaris correspundents sto vegnir concludiu, che las persunas cun tenuta critica enviers la fusiun vegnan cun gronda probabladad buc a midar lur meini, era buc tier adattaziuns che fussan aunc pusseivlas vid il project da fusiun.
Sin fundament da quella sitaziun da partenza han las duas suprastonzas communalas decidiu communablamein da rumper giu il project da fusiun. Trun e Sumvitg vegnan e cuntinuar cun lur stretga collaboraziun en las spartas scola populara, pumpiers, provediment d’aua, purificaziun dallas auas tschuffas ed allianza da taglia. Ord il questiunari ei era resultau, che la populaziun ei da principi positiva enviers ina collaboraziun enteifer igl uffeci forestal ed il menaschi tecnic. Sch’il project d’in niev baghetg economic communabel per igl uffeci forestal, il menaschi e tecnic e dil depot dils pumpiers, il qual ei vegnius presentaus el rom dalla fusiun, vegn persequitaus vinavon, vegnan las suprastonzas communalas a decider suenter ulteriurs sclariments pli tard.
Resultats dalla retscherca da fusiun
Suprastonzas communalas Trun e Sumvitg
