Museum Sursilvan Cuort Ligia Grischa
Via Principala 90, 7166 Trun
Il Museum Sursilvan Cuort Ligia Grischa a Trun ei in dils pli bials edifecis historics en Surselva. El ei vegnius erigius da 1674-1679 dalla claustra da Mustér ed ha surviu sco casa cumin dalla Ligia Grischa. La sala dil causligia, era numnada sala d’uoppens, fuorma il cor dalla casa.
Oz gioga igl art en la Cuort Ligia Grischa ina impurtonta rolla ed ei la raschun che bia amaturas ed amaturs digl art visetan il museum. Exposiziuns permanentas d’ovras originalas ein dedicadas als enconuschents artists daTrun: Alois Carigiet, Matias Spescha, Gieri Schmed e sora Gelia Degonda.
Il museum resta serraus entochen ils 28-03-2026.
Occurrenzas 2026
| sonda | 28-03 | 16.00 | Reavertura e vernissascha dallas exposiziuns d’art dad Alois Carigiet e Matias Spescha | |
| sonda | 04-04 | 16.00 | Vernissascha dall’exposiziun cun fotografias da Leo Condrau | |
| mesjamna | 06-05 | Suentermiezdi per affons | ||
| sonda | 23-05 | 14:15 | Guida publica cun Leo Condrau | |
| venderdis | 10-07 | 19:00 | Referat/discuors cun Leo Condrau | |
| sonda | 18-07 | 17:00 | Vernissascha dall’exposiziun d’art da Beat Manetsch | |
| dumengia | 23-08 | 14:15 | Guida publica cun Beat Manetsch | |
| sonda | 29-08 | 19:00 | Sera da film cun Giusep Decurtins (Sala da cultura en scola) | |
| sonda | 12-09 | 19:00 | Referat/Discuors cun Beat Manetsch | |
| sonda | 03-10 | 18:00 | La Tavolata, tscheina cul tema temps mediaval | |
| sonda | 31-10 | 14:15 | Finnissascha e guida publica cun Beat Manetsch | |
Exposiziuns d’art 2026
Alois Carigiet, ovras tumprivas
Alois Carigiet ei naschius ils 30 d’uost 1902 a Trun. Suenter d’haver terminau igl emprendissadi sco pictur da decoraziun lavura el tochen il 1939 sco graficher en siu agen atelier a Turitg. Silsuenter serenda el en Surselva, marida il 1942 e survegn duas feglias e lavura sco artist liber. 1945 – 1965 cumparan ils cudischs d’affons renomai. Dils onns 1950 – 1960 exequescha A. C. incumbensas grondas per maletgs da preits e fatschadas en tut la Svizra. Duront ils onns 60 e 70 elavurescha el numerusas litografias. A. C. miera igl 1. d’uost 1985 en la casa d’attempai a Trun.
Matias Spescha, ovras tumprivas
Matias Spescha (1925–2008), oriunds da Trun, era in artist svizzer impurtont digl art abstract. Suenter in emprendissadi da cusunz e suenter la lavur sco pictur da placats a Turitg ha el studegiau a Paris ed ha viviu pli tard a Bages en Frontscha dil Sid. Sias ovras sedistinguen tras reducziun e profunditad emoziunala. Siu art sveglia emoziuns ed envida era da meditar. El ei vengius undruaus cun plirs premis d’art ed ha surdau entginas da sias ovras al museum da sia vischnanca nativa a Trun.
04-04 – 11-07-2026 Exposiziun da fotografias da Leo Condrau
18-07 – 31-10-2026 Exposiziun d’art da Beat Manetsch
La sala da dertgira
La sala da dertgira ei ornada cun ils uoppens dils causligia dapi l’entschatta dalla Ligia Grischa igl onn 1424 e dapi gl’onn 1790 cun ils uoppens da tut ils magistrats ord igl anteriur territori dalla Ligia Grischa.
La stiva digl avat
Avat Adalbert II de Medell ha schau construir la Cuort claustrala 1674-79 e 1682 iI custeivel tabliau en la stiva abbaziala entras iI frater Pieder Solèr da Schluein.
Divertiment per affons
Museums ein daditg buc mo pli loghens nua ch’ins va ruasseivlamein tras exposiziuns. En nies sectur niev concepius si sut il tetg pon affons emprender ad enconuscher thematicas historicas ed artisticas, per exempel cun cumbinialas e giugs, cun zambergiar e malegiar ni cun lignar e tuccar. Quei fa la viseta dil museum tier in ver eveniment.
Il curtin
Il curtin construius 2018 daniev envida da star e far ina pausa. Era ei quei in adattau plaz per apéros da nozzas, gruppas ni famiglias.
Uras d’avertura 2026:
28 da mars – 31 d’october
gliendisdis, mesjamna, sonda e dumengia mintgamai 14 – 17
Prezis d’entrada
| carschi | frs 10.– |
| affons naven da 7 onns | frs 5.– |
| guidas 60 minutas | frs 90.– |
Sclariments e guidas
telefon 081 943 25 83
ni museum@trun.ch
