Museum Sursilvan Cuort Ligia Grischa
Via Principala 90, 7166 Trun
Il Museum Sursilvan Cuort Ligia Grischa a Trun ei in dils pli bials edifecis historics en Surselva. El ei vegnius erigius da 1674-1679 dalla claustra da Mustér ed ha surviu sco casa cumin dalla Ligia Grischa. La sala dil causligia, era numnada sala d’uoppens, fuorma il cor dalla casa.
Oz gioga igl art en la Cuort Ligia Grischa ina impurtonta rolla ed ei la raschun che bia amaturas ed amaturs digl art visetan il museum. Exposiziuns permanentas d’ovras originalas ein dedicadas als enconuschents artists daTrun: Alois Carigiet, Matias Spescha, Gieri Schmed e sora Gelia Degonda.
Occurrenzas 2026
| sonda | 28-03 | 16:00 | Vernissascha dall’exposiziun d’art „Alois Carigiet – Matias Spescha. Ovras tumprivas“ | |
| sonda | 04-04 | 16:00 | Vernissascha dall’exposiun da fotografias da Leo Condrau | |
| sonda | 11-04 | 14:15 | Guida publica tras las exposiziuns d’art dad Alois Carigiet e Matias Spescha cun Alexa Giger | |
| mesjamna | 22-04 | 14:15 | Suentermiezdi per affons | |
| dumengia | 03-05 | 17:00 | Referat cun Martin Cabalzar sur dil svilup turbulent dalla pressa romontscha | |
| mesjamna | 06-05 | 14:15 | Luvratori per affons cun Leo Condrau cul tema fotografar (cun annunzia) | |
| dumengia | 17-05 | 14:00 | Di internaziunal dils museums cun diversas guidas ed activitads per affons | |
| sonda | 23-05 | 14:15 | Guida publica cun Leo Condrau tras l’exposiziun da fotografias | |
| venderdis | 10-07 | 19:00 | Sera d’inscunter e discuors cun Leo Condrau | |
| sonda | 11-07 | 14:15 | Guida publica cun Leo Condrau e finissascha dall’exposiziun | |
| sonda | 18-07 | 17:00 | Vernissascha dall’exposiziun d’art «…dils davos onns» da Beat Manetsch | |
| mesjamna | 29-07 | 14:15 | Suentermiezdi per affons | |
| sonda | 01-08 | 14:00 | Emprem d’uost el museum | |
| dumengia | 16-08 | 17:00 | Sera da film cun Giusep Decurtins-Deplazes, moderaziun Gieri Venzin (en Sala da cultura en casa da scola) | |
| dumengia | 23-08 | 14:15 | Guida publica cun Beat Manetsch tras l’exposiziun d’art | |
| sonda | 05-09 | 19:00 | Sera d’inscunter e discuors cun Beat Manetsch | |
| sonda | 03-10 | 18:00 | La Tavolata: ina tscheina sco dil temps medieval dalla Ustria dalla Staziun Sumvitg-Cumpadials (cun annunzia) | |
| mesjamna | 14-10 | 14:15 | Suentermiezdi per affons | |
Ils detagls dallas occurrenzas e tuttas informaziuns pertuccont annunzia anfleis sin nossa pagina da web www.museum-trun.ch.
Exposiziuns d’art 2026
28-03 – 31-10: Alois Carigiet – Matias Spescha. Ovras tumprivas
La fin dils onns 1930 banduna Alois Carigiet il marcau da Turitg e secasa a Platengia ella val da sia affonza. Zacons onns pli tard banduna Matias Spescha siu vitg e serenda a Turitg. Omisdus vulan daventar artists. L’exposiziun tematisescha la relaziun amicabla dils dus artists da Trun e muossa per l’emprema gada en lur vitg nativ zacontas da lur ovras tumprivas. Ella vegn curatada da Alexa Giger e Gieri Venzin.
04-04 – 11-07: Exposiziun da fotografias da Leo Condrau
18-07 – 31-10: Exposiziun d’art «…dils davos onns» da Beat Manetsch
Guidas privatas per gruppas tras l’exposiziun
cuoz: 60 minutas, cuosts: CHF 90.-, plus CHF 10.- entrada per persuna
termin: sin damonda, max. 25 persunas
Luvratori per classas da scola
cuoz: 90 minutas, cuosts: CHF 90.-
termin: sin damonda, max. 15 scolarAs
Gruppas e classas da scola che vulan visitar il museum duein per plascher s’annunziar:
081 943 25 83 | museum@trun.ch
La sala da dertgira
La sala da dertgira ei ornada cun ils uoppens dils causligia dapi l’entschatta dalla Ligia Grischa igl onn 1424 e dapi gl’onn 1790 cun ils uoppens da tut ils magistrats ord igl anteriur territori dalla Ligia Grischa.
La stiva digl avat
Avat Adalbert II de Medell ha schau construir la Cuort claustrala 1674-79 e 1682 iI custeivel tabliau en la stiva abbaziala entras iI frater Pieder Solèr da Schluein.
Activitads per affons
Nies museum ei in liug vivent cun activitads captivontas per affons. En nies sectur sut il tetg scuvieran els tematicas historicas ed artisticas cun giugs, cumbinialas, zambergiar, malegiar ni luvrar cun materials e staziuns interactivas. Aschia daventa la viseta in’experientscha speciala ed in ver eveniment per l’entira famiglia.
Stanza da film
La stanza da film porscha a nos hosps la pusseivladad d’emprender d’enconuscher persunalitads interessantas e da s’informar davart la historia dil museum, dalla vischnaunca da Trun e dalla regiun. Ina schelta da films documentescha ils svilups culturals, historics e socials e cumplementescha las exposiziuns cun ina presentaziun attractiva ed informativa.
La Gasetta Romontscha
Las Gasettas Romontschas naven da 1871 san vegnir legidas tier nus e dattan ina impurtonta investa ella historia culturala, linguistica e sociala dalla regiun.
Il curtin
Il curtin construius daniev 2018 envida da star e far ina pausa. Era ei quei in adattau plaz per apéros da nozzas, gruppas ni famiglias.
Uras d’avertura 28-03 – 31-10-2026:
gliendisdis, mesjamna, venderdis, sonda e dumengia mintgamai 14 – 17
(duront il fenadur ed uost uras d‘avertura supplementaras il venderdis sera, mira nossa pagina da web)
Prezis d’entrada
| carschi | frs. 10.– |
| affons naven da 7 onns | frs. 5.– |
| guidas 60 minutas | frs. 90.– |
Sclariments e guidas
telefon 081 943 25 83
ni museum@trun.ch
